सुरक्षण मुद्रण केन्द्र नेपालको संविधानको अनुसूची-५ को दफा ३१ अनुसार “संघीय सरकारको अधिकार” अन्तर्गत पर्ने संवैधानिक निकाय हो। यस केन्द्रको प्रमुख दायित्व देशका अत्यावश्यक र गोपनीय मुद्रण सामग्रीहरूको डिजाइन, विकास र उत्पादन गरी राष्ट्रिय प्रशासन र जनविश्वास सुदृढ गर्नु हो।

सुरक्षण मुद्रण केन्द्रले सुरक्षण मुद्रण ऐन, २०८१ बमोजिम नागरिकता, राष्ट्रिय परिचयपत्र (National ID), राहदानी (Passport), ड्राइभिङ लाइसेन्स, अन्तःशुल्क स्टिकर र बैंक नोट लगायतका छ वटा विशेषाधिकारयुक्त सुरक्षण सामग्रीहरूको मुद्रण गर्दछ। साथै, आवश्यकताअनुसार राजश्व टिकट, भिसा स्टिकर, चेकबुक, स्मार्ट कार्ड लगायतका अन्य सुरक्षण मुद्रण सामग्रीहरूको उत्पादन र आपूर्ति पनि केन्द्रमार्फत गरिन्छ।

यस संस्थाको प्रारम्भिक संरचना सुरक्षण मुद्रण विकास समितिको गठन आदेश, २०७३ (सन् २०१६) अनुसार गरिएको हो भने, सुरक्षण मुद्रण ऐन, २०८१ र सुरक्षण मुद्रण नियमावली, २०८२ (सन् २०२५) जारी भएपछि यसको कानुनी तथा संस्थागत ढाँचा थप सुदृढ गरिएको छ।